迪叔最近有舖湯麵癮，於是拉埋迪妹一齊去試由香港人主理嘅神羊米線🍜
有4種豬骨湯底俾大家揀：清湯、蕃茄、酸辣、麻辣
迪叔緊係試麻辣，而唔食得辣嘅迪妹揀咗蕃茄
麻辣係10小辣級數，唔食得辣嘅麻甩友可以挑戰下
蕃茄就啱晒想食得清新d嘅麻甩友
肉就有得揀：豬腩肉、雞肉、肥牛，食齋嘅可以揀素食option
迪叔同迪妹都揀咗肥牛🐮
欣賞佢個肥牛係燒過嘅，而唔係就咁好hea就咁淥熟佢
肥牛好有牛味同焦香，可惜韌咗dd
除咗肉，仲有ok多唔係肉嘅配料俾大家揀
迪叔揀咗魚腐，喺香港食米線嘅感覺返晒嚟
想養生減肥嘅有得揀菜同埋芋絲
話說迪妹揀咗芋絲，咁d芋絲放咗喺底，仲要同米線一樣色，搞到佢以為漏咗芋絲🤡
話說基基知道迪叔介紹神羊嗰陣，就俾咗呢段食評我，thanks bro
👇🏼👇🏼👇🏼
酸辣米線: 湯底唔油超香，係想一食再食嘅感覺。佢嘅 grill 嘢係零舍出色，烤腩肉同雞肉都帶又焦香，口感滿分
椒鹽燒蝦: 以為頂多得兩串蝦咁大把，點知出到黎有四隻！蝦殼燒得勁香，但略嫌調味重手左少少。下次會想試埋大虎蝦
凍檸茶：份量好足！係食完成碗麵都仲有，唔駛慳住黎飲個種爽！不過如果再多少少檸檬嘅澀味就 perfect 池啦
📍Holy Sheep 神羊米線
Unit 197, 2nd floor, Hawley Wharf, London NW1 8AA
喂係咪個個都知雲貴川開咗🍜-
相信消息靈通嘅麻甩友都留意到雲貴川4月26號soft opening!咁重要嘅事麻甩佬們當然即刻狗衝去整返碗米線。
我地叫左麻辣米線，麻辣皮蛋同麻辣雞翼。米線黎講本身價錢(~£10 睇你叫咩湯底)包左一餸，加餸每款£1.5-£2.5。湯底就有豬骨湯/酸辣湯/麻辣湯/蕃茄湯。
先講個麻辣湯底，絕對係香港嘅味道。湯頭濃郁飄香，d 米線索曬辣汁咁逐啖送入口真係停唔到落嚟。特別推介麻辣腩肉，煮得好淋好惹味~ 麻辣雞肉如果滑返d就更出色~ 炸醬同墨演就正常發揮！
麻辣皮蛋無叫錯，個辣汁同皮蛋勁夾，係刺激味蕾之選。
麻辣雞翼一碟四隻，咬落去唔乾幾juicy。佢地仲有款炸醬雞翼㗎，試左嘅麻甩友麻煩話聲比uncles 聽掂唔掂。叫杯凍野解辣係常識唔使講啦。鐵羹篤檸茶喎，感覺返曬黎啊喂！
價錢方面三餸一小食叫埋飲品就£25，你啱啊係香港幾倍價錢。日日食就做唔到啦，但係間唔中黎止下米線癮唔錯唔錯。
要讚嘅係老闆好用心收集意見，仲話之後會慢慢出新野。麻甩佬們期待佢地越做越好。
📍 Yun Gui Chuan Rice Noodle 雲貴川米線
76 Brick Lane, London E1 6RL
3. 勁腍茶記牛腩撈粗｜八大八小
人在異地，就會好想食茶記，係香港波波其實好少食，係有時整返個沙嗲牛食下，今次咁岩約咗麻甩友，一於試吓八大八小。
餐廳裝修都幾靚，去到三點都接近全間餐廳full晒，搞到波波對佢好期待。我哋叫咗個牛腩撈粗、芝士蕃茄焗豬扒飯同埋流沙黃金西多士，仲有兩杯凍檸茶。
牛腩撈粗味道唔錯，牛腩炆得好淋同好入味，加上粗麵，真係有香港麵舖感覺。芝士蕃茄焗豬扒飯，其實就係一哥焗豬扒飯，味道其實唔太差，但係 uncle ball 都係鍾意一哥多啲。
最出色係西多士，佢係勁流心，其實波波係唔知佢流心，一切好有驚喜。新鮮炸起，加上糖漿同埋流沙，甜度剛好。
另外佢嘅凍檸茶，味道係相當之香港，如果有home sick不妨去止下㾗
By Uncle Ball
📍八大八小 the eight restaurant
68-70 Shaftesbury Ave, London W1D 6LZ
4. 濃郁越式生牛肉湯河｜Dragonfly Cafe
食唔到港式牛腩河，唯有食越南牛肉湯河頂住先🇻🇳
首先嘢飲唔洗諗一定係越南咖啡，平時唔飲甜咖啡嘅迪叔覺得加咗煉奶好ok
其中一樣享受嘅係睇住d咖啡慢慢滴落嚟，由於要等所以會覺得好飲d同埋會更加享受，就好似溝女咁
前菜嘅米卷好清新，食落好舒服
雖然佢主要係菜，但有陣好舒服嘅herb味，就算唔點醬都好食
然後重點一定係生牛肉湯河🐮
見住d牛肉由生慢慢浸到熟真係好正
湯底好重牛肉味，加埋青檸汁增添清爽感，可以係咁飲個湯
但迪叔有樣嘢唔明：加辣椒有辣味，加青檸汁抵銷咗辣味，咁到底又加辣椒又加青檸有咩意思？🤡
📍Dragonfly Cafe
71 Compton St, London EC1V 0BN
5. 澳洲主廚拉麵店｜Bone Daddies
天氣凍凍地整返碗拉麵都咪話唔爽，加上而家日日比人係facebook同ig視覺輪姦，唯有係英國搵下有無好食少少既日本野。
Bone Daddies 係由澳洲主廚係英國開設，想講以外國人黎講，整既湯底唔差，叉燒我就覺得柴皮左少少，但蛋、麵同湯底波波就覺得唔錯。 放飯時間大家可以坐到身貼身咁，另外最貼心係佢有預備橡根比d囡囡，咁就唔洗頭髮也吃拉麵。
By Uncle Ball
📍Bone Daddies
Bone Daddies Soho, 31 Peter St, London W1F 0AR
6. 四川酸菜魚米線｜Mi Canteen 米家
呢排天氣成日突然凍，有時行行下街都會想食碗米線暖一暖。平時去China Town 成日經過呢間米家，今轉入完貨就去試試佢。
餐牌主打川菜, 小食主菜甜品有齊。米線都有十幾款口味，酸辣肥牛，雞湯蝦滑，酸菜魚等等，睇餐牌個下真係會流晒口水🤓
經過幾番糾結之後，Uncle Jet 最終揀咗酸菜魚米線。上菜個下見到脆花生開心左幾秒，因為唔係好多地方有。魚肉幾滑無骨，湯底濃郁惹味，但就明顯落左味精🙊 拿，呢啲都係其次，食米線最緊要其實係個麵底。Uncle Jet 個人就認為麵質唔夠煙韌，無想像中咁彈牙，絕對係一個扣分位。
至於期待左成餐飯嘅紅糖糍粑，完全唔係應該有嘅質地🤧 早知試其他好過…
我會歸類佢為試一次就夠嘅餐廳。你知啦，有啲嘢唔試過唔心息㗎嘛係咪！
心中吶喊：三哥究竟幾時開黎倫敦啊！！
📍Mi Canteen 米家
4 Macclesfield St, London W1D 6AX
7. 一試上癮韓式海鮮麵｜3KOBROS
「讓你一試就上癮的韓式海鮮麵」
呢間第一次食真係無咩期望，不過一試佢個泡菜煎餅同炸雞，就馬上愛上呢間OPPA！老實講，呢間野係一D都唔就腳，山長水遠入去，不過人地用作品說話，一直坐係度都會不斷見到好多外賣專員黎攞外賣，生意源源不絕。
佢既炸雞係好出色，UNCLE BALL最鐘意係Soy Garlic，甜甜地，炸粉唔會太厚，所有野都剛剛好。
泡菜煎餅份量其實都唔叫少，而且厚道剛好，煎得香脆香口。
想講，重點來了！！！佢既韓式海鮮麵真係會越食越上癮，最好食既係佢麵條，口感非常好，而且湯底充滿海鮮味，仲有係佢海鮮既量係勁多，二人共享都OK LA，鐘意辣麵既一定唔好走寶。
By Uncle Ball
📍3KOBROS Korean Restaurant
240 Westferry Rd, London E14 3RQ
【本文獲 麻甩食評 授權轉載】
作者簡介：
四條在英麻甩佬🇭🇰甩到全英都係毛🇬🇧- 👨🏻ᴜɴᴄʟᴇ ʙᴀʟʟ 波波ᴅɪᴄᴋ 迪迪ᴡᴇꜱᴛ 西西ᴊᴇᴛ 基基 🍖ꜰᴏᴏᴅɪᴇꜱ | ʙᴀꜱᴇᴅ ɪɴ ʟᴏɴᴅᴏɴ
ig: malutloinuk
Комментарии